काठमाडौँ, ३२ असार
गृहमन्त्री रमेश लेखकले विपद् जोखिम न्यूनीकरण तथा व्यवस्थापनमा सङ्घ, प्रदेश र स्थानीय सरकारबीच समन्वय र सहकार्य अपरिहार्य रहेको बताएका छन्।
आज गृह मन्त्रालयमा आयोजित कार्यक्रममा बोल्दै मन्त्री लेखकले नेपाल उच्च जोखिमपूर्ण भूगोलमा रहेको हुँदा विपद् व्यवस्थापन तीनै तहको साझा कार्यक्षेत्र भएको उल्लेख गर्दै सबै तहबीच सहकार्य आवश्यक भएको बताए।
उहाँले सातवटै प्रदेशमा रहेका आपत्कालीन गोदामघरहरू प्रदेश सरकारलाई हस्तान्तरण गरिएकामा, काठमाडौंको गोदाम भने विपद् व्यवस्थापन प्राधिकरण मातहत रहने जानकारी दिनुभयो।
स्थानीय सरकार नागरिकसँग सबैभन्दा नजिक हुने भएकाले पालिकास्तरमै आपत्कालीन गोदाम स्थापना गरी विपद् व्यवस्थापन प्रणालीलाई तल्लो तहसम्म सुदृढ बनाउनु पर्नेमा मन्त्री लेखकले जोड दिनुभयो। साथै, विपद् पूर्वसूचना, खोज, उद्धार र पुनःस्थापनामा सबै तह र सरोकारवालाबीच समन्वय आवश्यक रहेको उहाँको भनाइ थियो।
विगतमा विपद्का बेला राहत सामग्रीको उपयोग प्रक्रिया झन्झटिलो भएको उल्लेख गर्दै, अबको व्यवस्था सरल र प्रभावकारी बनाइने जानकारी पनि गृहमन्त्रीले दिनुभयो।
