काभ्रेपलाञ्चोक, १ साउन
मनसुनको सक्रियता र बाढीपहिरोको जोखिमका कारण विपद् न्यूनीकरणका लागि काभ्रेपलाञ्चोक खण्डअन्तर्गतको विपी राजमार्गमा आजदेखि एक महिनासम्म राति १२ घण्टा यातायात सञ्चालनमा रोक लगाइएको छ।
धुलिखेलस्थित जिल्ला प्रशासन कार्यालयका अनुसार काभ्रेभञ्ज्याङदेखि नेपालथोक (सिन्धुली सीमा) सम्मको क्षेत्रमा प्रत्येक दिन साँझ ५ बजेदेखि बिहान ५ बजेसम्म सवारी सञ्चालन बन्द रहनेछ। काठमाडौँबाट जाने सवारीलाई जिल्लाको काभ्रेभञ्ज्याङ र काठमाडौँतर्फ आउने सवारीलाई सिन्धुलीको सिमाना नेपालथोकमै रोकिने प्रमुख जिल्ला अधिकारी उमेशकुमार ढकालले बताउनुभयो।
प्रमुख जिल्ला अधिकारी ढकालले जानकारी दिँदै भन्नुभयो , “मनसुनजन्य विपद् रोकथामका लागि तीन जिल्ला (काभ्रेपलाञ्चोक, सिन्धुली र रामेछाप)को सुरक्षा समितिबीच समन्वयमा निर्णय गरिएको हो।” यसअघि असार ७ गतेदेखि असार मसान्तसम्म पनि साँझ ६:३० बजेदेखि बिहान ५ बजेसम्म सवारी सञ्चालनमा प्रतिबन्ध लगाइएको थियो।
गत वर्ष असोजको बाढीपहिरोले चौकीडाँडादेखि वर्षेखोलासम्मको आठ किलोमिटर सडक बगाउँदा अस्थायी मार्ग प्रयोग गरिएको थियो। यस वर्ष पनि पछिल्लो एक हप्तामा चार पटक सडक अवरुद्ध भइसकेको छ।
राजमार्गको १६० किलोमिटरमध्ये ८४ किलोमिटर क्षेत्रमा अत्यधिक क्षति पुगेको कार्यालयले जनाएको छ। स्थायी पुनर्निर्माणका लागि चार खण्डमा ठेक्का प्रक्रिया अघि बढाइएको छ। काठमाडौँ र पूर्वी नेपाल जोड्ने छोटो दूरीको मार्ग भएकाले यस राजमार्गमा दैनिक हजारौँ सवारी साधन सञ्चालन हुने गर्दछन्।
