काठमाडौँ, ३२ असार
सरकारले साउन महिनालाई ‘डेङ्गी सचेतना महिना’का रूपमा घोषणा गरेको छ। आज आयोजित एक कार्यक्रममा स्वास्थ्य तथा जनसङ्ख्यामन्त्री प्रदीप पौडेलले डेङ्गी संक्रमणको जोखिम बढ्ने साउन महिनालाई लक्षित गर्दै यो अभियानको घोषणा गर्नुभयो।
मन्त्री पौडेलले साउनदेखि कात्तिक महिनासम्म डेङ्गीको संक्रमण तीव्र हुने भएकाले साउनको सुरुबाटै सचेतना फैलाउने उद्देश्यले यो निर्णय गरिएको जानकारी दिनुभयो। उहाँले साउन महिनादेखि हरेक शुक्रबार बिहान १० बजे ‘खोज र नष्ट गर’ अभियान सञ्चालन गरिने जनाउनुभयो।
“डेङ्गी नियन्त्रण सरकारको एकल प्रयासले सम्भव हुँदैन,” मन्त्री पौडेलले भन्नुभयो, “नीजि क्षेत्र, समुदाय र स्थानीय तहको सहभागिता अपरिहार्य छ।”
स्वास्थ्य मन्त्रालयका सचिव डा. विकास देवकोटाले घर वरपर पानी जम्न नदिने र लामखुट्टे नष्ट गर्ने उपायहरू अपनाउन सबैमा आग्रह गर्नुभयो। उहाँका अनुसार गत वर्षको अभियानले संक्रमण दर घटाएको थियो, र यस वर्ष पनि त्यसलाई निरन्तरता दिइनुपर्ने आवश्यकता रहेको छ।
स्वास्थ्य सेवा विभागका महानिर्देशक टङ्कप्रसाद बाराकोटीले डेङ्गी एडिज जातको लामखुट्टेको टोकाइबाट फैलिने भएकाले ती लामखुट्टे खोजेर नष्ट गर्नु नै सबैभन्दा प्रभावकारी उपाय भएको बताउनुभयो।
विश्व स्वास्थ्य सङ्गठन (डब्लुएचओ) नेपालका प्रमुख डा. राजेश पाण्डवले डेङ्गी नियन्त्रणका लागि बहुक्षेत्रीय समन्वय आवश्यक रहेको बताए। इपिडिमियोलोजी तथा सरुवा रोग नियन्त्रण महाशाखाका निर्देशक डा. चन्द्रभाल झाले जोखिम क्षेत्र पहिचान गरेर स्थानीय तहलाई अभियान सञ्चालन गर्न निर्देशन दिइसकिएको जानकारी दिनुभयो।
महाशाखाका किटजन्य रोग शाखाका प्रमुख डा. गोकर्णप्रसाद दाहालका अनुसार गत पुस १७ देखि असार ३१ सम्म ७३ जिल्लामा एक हजार ९८३ जनामा डेङ्गी संक्रमण देखिएको छ।
डा. दाहालले “एडिज एजिप्टी” र “एडिस एल्बोपिक्टस” प्रजातिका लामखुट्टे सफा पानीमा फूल पार्ने र ती फूलबाट निस्केको लार्भाले वयस्क भएपछि मानिसलाई टोकेमा डेङ्गी फैलिने जानकारी दिनुभयो।
