काठमाडौँ: नेपाली कांग्रेसका महामन्त्री तथा प्रतिनिधिसभा सांसद गगनकुमार थापाले जलवायुजन्य प्रकोपको तयारीमा सरकारलाई थप जिम्मेवार बनाउनुपर्ने आवश्यकता औंल्याएका छन् ।
हिन्दूकुश हिमालय क्षेत्रका सांसदहरूको बैठकको पहिलो सत्रलाई सम्बोधन गर्दै उनले दक्षिण एसियालाई जलवायु परिवर्तनबाट सबैभन्दा बढी प्रभावित क्षेत्रको रूपमा चिनिँदै आएको भन्दै यसका चुनौतीहरूलाई गम्भीरतापूर्वक सामना गर्नुपर्ने बताए । भारत, पाकिस्तान, नेपाल र बङ्गलादेशमा पछिल्ला वर्षमा देखिएका विभिन्न जलवायुजन्य घटनाहरूले यस क्षेत्रमा संकट झनै गहिरिँदै गएको उनको भनाइ थियो ।
थापाले पाकिस्तानमा हालै आएको बाढी र पहिरोलगायत क्षेत्रीय प्रकोपहरूलाई उदाहरण दिँदै जलवायु संकटबारे सचेत रहनु अनिवार्य रहेको उल्लेख गरे । उनले भने, “हामी सीमापार जोखिमको मूल्याङ्कन गर्न सक्छौँ, जानकारी र सीप साझा गर्न सक्छौँ । अब जलवायु संकट न्यूनीकरणमा मौन बस्ने अवस्था छैन ।”
भविष्यमा पनि यस्ता संवादलाई निरन्तरता दिनुपर्ने बताउँदै उनले संसदीय बहस र छलफललाई सशक्त बनाउन आग्रह गरे । जलवायु विषयलाई राष्ट्रिय बहसको मूलधारमा ल्याउन सांसदहरूको भूमिका अपरिहार्य हुने उनको भनाइ थियो । साथै, समुदायस्तरमा सङ्कलित अनुकूलनका ज्ञान र अनुभवलाई नीति निर्माणदेखि कार्यान्वयनसम्म प्रयोग गर्नुपर्ने उनले जोड दिए ।
