काठमाडौँ: कानुन, न्याय तथा संसदीय मामिलामन्त्री अजयकुमार चौरसियाले संक्रमणकालीन न्याय पीडितलाई छिटो न्याय दिलाउन सरकार निरन्तर सक्रिय रहेको बताएका छन् ।
बेपत्ता पारिएका व्यक्तिको छानबिन आयोगले बलपूर्वक बेपत्ता पारिएका पीडितको अन्तर्राष्ट्रिय दिवसका अवसरमा आज काठमाडौँमा आयोजना गरेको कार्यक्रममा मन्त्री चौरसियाले भने, “ऐन संशोधन भइसकेको छ, दुवै आयोगमा पदाधिकारी आइसकेका छन्, नियमावली संशोधन मन्त्रिपरिषद्मा पुगेको छ । अब छिटो न्याय दिन काम गर्नुपर्छ, सरकार पूर्ण सहयोग गर्न तयार छ ।”
सत्य निरूपण तथा मेलमिलाप आयोग र बेपत्ता छानबिन आयोग दुबैलाई सक्रियतापूर्वक काम गर्नुपर्ने आवश्यकतामा जोड दिँदै उनले जनशक्तिको व्यवस्थापनबारे पनि छलफल भइरहेको बताए ।
त्यसैगरी, राष्ट्रिय मानव अधिकार आयोगका अध्यक्ष तपबहादुर मगरले द्वन्द्वका समयमा व्यक्तिलाई बेपत्ता पार्ने जिम्मेवारमाथि सरकारले कारबाही गर्नुपर्ने माग गरे । उनले पीडितलाई न्याय दिन आयोगलाई आवश्यक सहयोग गर्ने प्रतिबद्धता पनि व्यक्त गरे ।
बेपत्ता व्यक्तिको छानबिन आयोगकी अध्यक्ष लीलादेवी गडतौलाले संक्रमणकालीन न्याय प्रक्रियामा ढिलाइ भएकै कारण द्वन्द्वपीडितको घाउमा मलम लगाउन ढिलाइ भएको स्वीकार गरिन् । उनले बेपत्ता भएका व्यक्तिसम्बन्धी तथ्यांकमा एकरूपता ल्याउने काम भइरहेको र आयोग तीव्र गतिमा अगाडि बढिरहेको जानकारी दिइन् ।
