ललितपुर: ऊर्जा, जलस्रोत तथा सिँचाइमन्त्री दिपक खड्काले लघु तथा साना जलविद्युत् दीगो र प्रभावकारी बनाउन व्यवसायिक व्यवस्थापन र आर्थिक पारदर्शिता आवश्यक रहेको बताएका छन्।
राष्ट्रिय लघु तथा साना जलविद्युत् उपभोक्ता समाज नेपालको आठौँ वार्षिक साधारणसभामा मन्त्री खड्काले अप्ठेरा भूगोलमा विद्युत् पुर्याउने काम सामाजिक र आर्थिक रूपान्तरणमा योगदान पु¥याउने र रोजगारी सिर्जना गर्ने उल्लेख गर्दै, उपभोक्ता र समाजको सहभागिता प्रशंसनीय रहेको बताए।
उनले लघु जलविद्युत् क्षेत्रमा ऋणलाई अनुदानजस्तो ठानेर वितरण गर्दा आर्थिक अनुशासनमा समस्या आउन सक्ने भएकाले व्यावसायिक मोडेलमा अघि बढाउनुपर्नेमा जोड दिए। मन्त्री खड्काले सरकारले राष्ट्रिय प्रसारण ग्रीडलाई प्रत्येक स्थानीय तहसम्म पुर्याउने र २८ हजार ५०० मेगावाट विद्युत् उत्पादन गर्ने दीर्घकालीन लक्ष्यतर्फ तीव्र गतिमा अघि बढिरहेको जानकारी पनि दिए।
समारोहमा स्थानीय तहका प्रतिनिधिहरू, उपभोक्ता समाजका सल्लाहकार र महिला सञ्जालका प्रतिनिधिहरूले लघु जलविद्युत् संस्थाहरूको योगदान, दीगो व्यवस्थापन, सामुदायिक सहभागिता र महिला प्रतिनिधित्व सुनिश्चित गर्नुपर्नेमा जोड दिएका थिए।
राष्ट्रिय लघु तथा साना जलविद्युत् उपभोक्ता समाज नेपालका अध्यक्ष नारायणध्वज खड्काले आगामी वर्षका लागि संस्थाको कार्यक्रम र तालिममार्फत प्राविधिक क्षमता विकासमा ध्यान दिइने बताए। उनले खेर गएको विद्युत् सदुपयोग गर्न राष्ट्रिय प्रणालीमा जडान गर्ने प्रयास हुने जानकारी दिए।
