काठमाडौं: सामाजिक सञ्जालमा प्रतिबन्ध लगाउने सरकारको निर्णय र देशभरको व्यापक भ्रष्टाचारविरुद्ध ‘जेन–जी’ पुस्ता सोमबार सडकमा उत्रिएको छ। काठमाडौंको माइतीघर मण्डलामा भेला भएका युवाहरूले सुशासनको पक्षमा आवाज उठाउँदै प्रदर्शन गरेका हुन्।
प्रदर्शनमा विद्यार्थीहरू विद्यालयको यूनिफर्ममै सहभागी भएका थिए। उनीहरूले विभिन्न प्लेकार्डसहित भ्रष्टाचारविरुद्ध नाराबाजी गरेका थिए। प्लेकार्डमा परराष्ट्रमन्त्री डा. आरजु राणा देउवा, सञ्चारमन्त्री पृथ्वीसुब्बा गुरुङ, प्रधानमन्त्री केपी शर्मा ओली, पूर्वप्रधानमन्त्री शेरबहादुर देउवा र पुष्पकमल दाहाल ‘प्रचण्ड’ लगायतका नेताहरूको फोटोसमेत टाँसिएको थियो।
आन्दोलनमा कलाकार र सामाजिक अभियन्ताहरूले समेत साथ दिएका छन्। त्यस्तै काठमाडौं महानगरपालिका प्रमुख बालेन्द्र शाह (बालेन) ले पनि जेन-जि युवाहरूको आन्दोलनलाई खुला समर्थन जनाएका छन्।
