काठमाडौं, असोज १५
जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचना अनुसार असोज १८ देखि २० गतेसम्म देशका विभिन्न स्थानमा अत्यधिक वर्षा हुने अनुमान गरिएको छ। यस क्रममा पहिरो, बाढी, डुबान, हावाहुरीलगायतका प्राकृतिक विपद् आउने उच्च सम्भावना रहेकाले नेपाल सरकारको गृह मन्त्रालयले देशभरका सरकारी तथा सार्वजनिक निकायमा तीन दिन सार्वजनिक बिदा दिने निर्णय गरेको छ।
गृह मन्त्रालयले शुक्रबार एक सार्वजनिक सूचना जारी गर्दै सो अवधिमा हुने अस्वाभाविक वर्षाका कारण सडक तथा हवाई यातायात अवरुद्ध हुन सक्ने र जनजीवन प्रभावित हुनसक्ने भन्दै नागरिकलाई विशेष सतर्कता अपनाउन अनुरोध गरेको छ। मन्त्रालयका प्रवक्ता जानन्द गजुरेलले हस्ताक्षर गरेको उक्त सूचनामा अनावश्यक बाहिर ननिस्कन, सुरक्षित स्थानमा बस्न र अत्यावश्यक कामबाहेकका गतिविधि स्थगित गर्न आग्रह गरिएको छ।
सूचनामा भनिएको छ,
“असोज १८ देखि २० गतेसम्म विपद् व्यवस्थापन र अन्य अत्यावश्यक सेवाबाहेकका सरकारी कार्यालय तथा विद्यालयमा सार्वजनिक बिदा रहनेछ। नागरिकहरूलाई सुरक्षाको दृष्टिले घरभित्र सुरक्षित बस्न र सम्भावित जोखिमबाट जोगिन सचेत रहन अनुरोध गरिएको छ।”
गृह मन्त्रालयले विपद् सम्भावित क्षेत्रका स्थानीय प्रशासन, सुरक्षाकर्मी तथा राहत निकायलाई उच्च सतर्कतामा रहन निर्देशन समेत दिएको छ।
