काठमाडौं: सञ्चार तथा सूचना प्रविधिमन्त्री जगदीश खरेलले ‘जेनजी’ आन्दोलनको जगमा बनेको वर्तमान सरकारले तोकिएको समयमै प्रतिनिधिसभा निर्वाचन सम्पन्न गर्नु प्रमुख जिम्मेवारी रहेको बताएका छन्।
राष्ट्रिय समाचार समिति (रासस) को भद्रकालीस्थित केन्द्रीय कार्यालयको अवलोकन भ्रमणपछि आयोजित कार्यक्रममा मन्त्री खरेलले आगामी फागुन २१ गते हुने निर्वाचन सफल बनाउन सबै पक्षको सहयोग आवश्यक रहेको उल्लेख गरे। उनले प्रधानमन्त्री सुशीला कार्कीले निर्वाचनमा सरकारको स्पष्ट प्रतिबद्धता जनाइसकेको जानकारी दिँदै सञ्चार जगत्ले वातावरण निर्माणमा महत्वपूर्ण भूमिका खेल्ने विश्वास व्यक्त गरे।
“जेनजी आन्दोलनको जगमा सबै राजनीतिक दल र जनताको चाहनामा बनेको यो सरकार निर्वाचनमा जान चाहन्छ,” मन्त्री खरेलले भने, “निर्वाचन आयोगले कार्यतालिका सार्वजनिक गरिसकेको छ, राससले पनि यसमा सहयोग गर्नेछ भन्ने विश्वास छ।”
सरकारका प्रवक्तासमेत रहेका मन्त्री खरेलले निर्वाचनका साथै सुशासन स्थापना, भ्रष्टाचार नियन्त्रण, जेनजी आन्दोलनका क्रममा भएको जनधन क्षतिको छानबिन तथा कारबाही, र प्राकृतिक विपद्पछि राहत तथा पुनःस्थापना वर्तमान सरकारको म्यान्डेटमा रहेको बताए।
उनका अनुसार आसन्न निर्वाचनको तयारीका लागि राजनीतिक दलहरुसँग प्रत्यक्ष र अप्रत्यक्ष रुपमा निरन्तर संवाद भइरहेको छ।
