काठमाडौँ : गृहमन्त्री ओमप्रकाश अर्यालले गृह मन्त्रालय हरेक हिसाबले अत्यन्त संवेदनशील रहेको बताएका छन्। उनले कतिपय काम र प्रक्रियाबारे सार्वजनिक रूपमा बोल्न पनि नमिल्ने अवस्था हुने बताएका छन्।
सामाजिक सञ्जालमार्फत विचार व्यक्त गर्दै मन्त्री अर्यालले भनेका छन्, “गृह मन्त्रालय हरेक हिसाबले संवेदनशील मन्त्रालय हो। कतिपय विषयमा के गर्दैछौँ भन्न पनि नमिल्ने, के गर्यौँ भन्न पनि नमिल्ने अवस्था हुन्छ।”
उनले आफ्नो कार्यकालभर शुद्ध चित्तले जिम्मेवारी पूरा गर्ने प्रतिबद्धता जनाउँदै भने, “कार्यकालको अन्त्यमा जनतालाई धैर्यका लागि धन्यवाद भन्नेछौँ। सुशासनको बाटो हिँड्दै देशलाई निर्वाचनमार्फत निकाससम्म पुर्याउने सरकारको जिम्मेवारी पूरा गर्नेछौँ।”
हाल केही समयदेखि ‘हामी नेपाल’ का संयोजक सुदन गुरुङसहित ‘जेनजी’ समूहले गृहमन्त्री अर्यालको कार्यशैलीप्रति असन्तुष्टि जनाउँदै उनको राजीनामा माग गर्दै आएका छन्।
