काठमाडौं: नेपाल शिक्षक महासंघका पदाधिकारीहरूले शिक्षा, विज्ञान तथा प्रविधिमन्त्री महावीर पुनसँग भेटवार्ता गरी आफ्ना मागहरूबारे औपचारिक ध्यानाकर्षण गराएका छन्। महासंघका अध्यक्ष लक्ष्मीकिशोर सुवेदी नेतृत्वको टोलीले सरुवा निर्देशिका खारेज, गत वैशाखमा भएको ९ बुँदे सहमतिको कार्यान्वयन, स्थानीय भत्ताको उपलब्धतासहितका मुद्दामा शीघ्र समाधान निकाल्न मन्त्री पुनलाई आग्रह गरेको हो।
केही स्थानीय तहले परिषद् बैठक सञ्चालन गर्न नसक्दा शिक्षकहरूको तलब–भत्ता रोकिएको विषयमा पनि महासंघले गम्भीर चासो व्यक्त गरेको छ। परिषद् नबस्दा बजेट पास हुन नसकी तलब निकासा अवरुद्ध भएकाले यस्तो अवस्थाको पुनरावृत्ति रोक्न पालिका परिषद् नभई पनि तलब–भत्ता निकासा हुने व्यवस्था बनाउन माग गरिएको छ।
महासंघले यसअघि गत चैत र वैशाखमा काठमाडौंकेन्द्रित लामो आन्दोलन चलाएको थियो। तीव्र दबाबकै कारण तत्कालीन शिक्षामन्त्री विद्या भट्टराईले राजीनामा दिएकी थिइन्। त्यसपछि मन्त्री बनेका रघुजी पन्तसँग भएको ९ बुँदे सहमतिमा शिक्षा ऐन जारी गर्ने लगायतका महत्वपूर्ण विषय समावेश थिए।
