काठमाडौं । आज बुधबार एमसीसीको विरोधमा काठमाडौंमा प्रदर्शन भईरहेको छ । अमेरिकी सहयोग परियोजना एमसीसी सम्झौता संसदमा टेबल गर्न लागेको विरोधमा विभिन्न राजनीतिक दलले संघीय संसद भवन नयाँ बानेश्वर वरपर प्रदर्शन गरेका हुन् ।
माइतीघरदेखि नाराजुलुससहित संघीय संसद भवनतर्फ एमसीसी विरोधी प्रदर्शनकारीलाई भवनभन्दा २०० मिटर पश्चिम एभरेस्ट होटल नजिक रोकिरहेको छ । उनीहरुलाई संघीय संसद भवनतर्फ निषेधित क्षेत्र तोडेर आउन खोजेपछि प्रहरीसँग झडप भएको छ ।
प्रहरीले प्रदर्शनकारीलाई तितरबितर पार्न अश्रुग्यास, पानीको फोहोरा र लाठी प्रयोग गरेको छ । झडपका क्रममा केही प्रदर्शनकारी घाइते पनि भएका छन् ।
त्यास्तै कानुन, न्याय तथा संसदीय मामिलामन्त्री दिलेन्द्रप्रसाद बडुले एमसीसी फागुन ६ गते संसद बैठकमा टेबुल गर्ने बताएका छन् । बुधबार प्रतिनिधिसभाको बैठकपछि पत्रकारहरुसँग कुराकानी गर्दै मन्त्री बडुले एमसीसी टेबुल गर्ने विषयमा दलहरुबीच थप छलफल आवश्यक परेकाले सहमति जुटाएर फागुन ६ गते पेश गर्ने बताएका हुन् ।
नेकपा एकीकृत समाजवादीका वरिष्ठ नेता झलनाथ खनालले प्रतिनिधिसभाको बैठकपछि दलहरुबीच सहमति नहुँदा नहुँदै अमेरिकी सहयोगसम्बन्धी परियोजना एमसीसी सम्झौता संसदमा टेबुल गर्न नहुने बताएका छन् ।
एमसीसीको विरोधमा प्रदर्शन गरिरहेका १३७ जनालाई प्रहरीले पक्राउ गरेको छ । पक्राउ परेकाहरुलाई नगर प्रहरी कार्यालय, भृकुटीमण्डसहित विभिन्न प्रहरी कार्यालयमा राखिएको छ ।
काठमाडौं प्रहरी प्रमुख एसएसपी सुदिप गिरीका अनुसार काठमाडौंको नयाँ बानेश्वर, माइतीघर लगायतको स्थानबाट उनीहरुलाई पक्राउ गरिएको बताएका छन् ।
