काठमाडौं । युक्रेनमा रहेका २२५ जना नेपालीहरु सुरक्षित केहि पोल्याण्ड, स्लोभाकिया, हंगेरी र रोमानिया पुगेका छन् । युद्धग्रस्त युक्रेनमा रहेका २२५ जना नेपालीहरु सम्पर्कमा आएका र सबै सुरक्षित रहेको जर्मनीको वर्लिनस्थित नेपाली दूतावासले जनाएको छ ।
केही नेपालीहरु युक्रेनबाट सुरक्षित तरिकाले सिमाना जोडिएका पोल्याण्ड, स्लोभाकिया, हंगेरी र रोमानियामा गइसकेको दूतावासले जनाएको छ । दूतावासले शनिबार एक विज्ञप्ति जारी गर्दै १५ जना नेपालीहरु पोल्याण्डमा, ३ जना स्लोभाकियामा, २ जना हंगेरीमा र १ जना रोमानियामा प्रवेश गरेको जानकारी दिएको हो
।त्यस्तै अन्य २३ जना स्लोभाकिया जानका लागि र २ जना रोमानिया जानका लागि बाटोमा रहेको दूतावासले जनाएको छ । एक सय जनाभन्दा बढी पोल्याण्ड जानका लागि प्रक्रियामा रहेको पनि दूतावासले जारी गरेको विज्ञप्तिमा उल्लेख छ ।्
रुसले आक्रमण थालेपछि युक्रेनमा फसेका विदेशी नागरिकहरुका लागि मानवीय सहायताको आधारमा पोल्याण्ड, स्लोभाकिया, हंगेरी र रोमानियाले आ–आफ्ना देशका सिमाना खुल्ला गरिदिएका छन् । नेपालीहरुलाई पनि आवश्यक कागजपत्र बोकेरै तिनै देशतर्फ जान वर्लिनस्थित दूतावासले आग्रह गरेको छ ।
पासपोर्ट, नगद, कोरोनाविरुद्धको खोप लगाएको भए सो खोप कार्ड समेत आफूसँग राखिराख्न दूतावासले सुझाव दिएको छ । केहि समय पहिले नेपालीहरुले आफुहरुको मर्ने बाच्ने ठेगान नभएकोले उद्धार गरिदिन आग्रह गरेका थिए ।
