शालीनका परिवारलाई न्याय दिलाउन सरकार प्रतिबद्ध : प्रधानमन्त्री

प्रधानमन्त्री पुष्पकमल दाहाल प्रचण्डले चितवनको एकता शिशु निकेतनस्थित होस्टेलमा मृत अवस्थामा फेला परेकी १४ वर्षीय बालिका शालीन पोखरेलका परिवारलाई न्याय दिलाउन सरकार प्रतिबद्ध रहेको बताउनुभएको छ । आज सामाजिक सञ्जालमार्फत प्रधानमन्त्री प्रचण्डले घटनाको यथार्थ छानबिन गरी पोखरेल परिवारलाई न्याय दिलाउन सरकार दृढ र प्रतिबद्ध रहेको उल्लेख गर्नुभएको हो । घटनाको गहन छानबिन गरी सत्यतथ्य पत्ता लगाउन यसअघि नै गृह मन्त्रालयलाई निर्देशन दिइसकिएको पनि उहाँले बताउनुभयो । फागुन १२ गते झुण्डिएको अवस्थामा बालिका शालीनको शव फेला परेको थियो । परिवारले बलात्कार पछि हत्या गरेको आरोपमा किटानी जाहेरी दिएका छन् । सोही आधारमा प्रहरीले स्कुलका प्रिन्सिपल, सहायक प्रिन्सिपल र वार्डेनलाई पक्राउ गरेको छ ।
यसैबिच नेकपा एमालेका अध्यक्ष केपी शर्मा ओलीले चितवनमा छात्रावासमा मृत फेला परेकी शालिन पोखरेलको मृत्यु प्रकरणमा गहिरो र विश्वसनीय अनुसन्धान गरी सत्य तथ्य बाहिर ल्याउन माग गर्नुभएको छ । यस्ता घटनामा बाहिरबाट हुने हल्ला र अफवाहले असहयोग पुग्ने भएकाले सबैले अनुसन्धानमा सहयोग गर्न ओलीले आग्रह गर्नुभयो । फेसबुकमा लेख्दै ओलीले बालिकाको हत्या वा आत्महत्या के हो सोको विश्वसनीय अनुसन्धान गर्नुपर्ने बताउनुभयो ।