मन्थली (रामेछाप) — मन्थली नगरपालिका–१ मा बालमैत्री स्थानीय शासनयुक्त तथा बालश्रममुक्त वडा घोषणा गर्ने उद्देश्यले एक भव्य समारोह सम्पन्न भएको छ। कार्यक्रमका प्रमुख अतिथि नेपाली कांग्रेस रामेछापका सभापति तथा निवर्तमान उर्जा, जलस्रोत तथा सिंचाइ राज्यमन्त्री माननीय पूर्णबहादुर तामाङ (कान्छाराम) हुनुहुन्थ्यो।
उक्त समारोहको सभापतित्व वडा अध्यक्ष होम प्रसाद पौडेलले गर्नुभएको थियो। कार्यक्रममा विभिन्न राजनीतिक दलका प्रतिनिधिहरू, स्थानीय जनप्रतिनिधि, प्रमुख जिल्ला अधिकारी, जिल्ला प्रहरि कार्यलयका प्रमुख, अनुसन्धान प्रहरि प्रमुख, अभिभावक, शिक्षक, विद्यार्थी, बाल सञ्जाल, बाल समूह, निगरानी समूह, आमा समूह, स्वास्थ्य स्वयंसेविका, सञ्चारकर्मी तथा नगरपालिकाका कर्मचारीहरूको उल्लेखनीय उपस्थिति रहेको थियो।
समारोहको अवसरमा वडा नं. १ सहित मन्थली नगरपालिकाका १४ वटै वडाहरूलाई बालविवाहमुक्त, निष्कलंक बालश्रममुक्त, अनिवार्य तथा निःशुल्क शिक्षाको सुनिश्चितता सहित बालमैत्री स्थानीय शासनयुक्त वडाका रूपमा घोषणा गरिएको हो।
प्रमुख अतिथि तामाङले सम्बोधन गर्दै बाल अधिकार, शिक्षा तथा सुरक्षाको सवालमा सबै तह र तप्काबाट साझा प्रयास आवश्यक रहेको बताए। “मन्थली नगरपालिकाले बालमैत्री शासनतर्फ लिएको यो कदम अनुकरणीय छ,” उहाँले भन्नुभयो।
वडा अध्यक्ष पौडेलले बालबालिकाको सर्वाङ्गिण विकासका लागि वडाले निरन्तर पहल गरिरहेको उल्लेख गर्दै, बालमैत्री नीतिहरू कार्यान्वयनमा थप सशक्त कार्यक्रम ल्याइने प्रतिबद्धता व्यक्त गर्नुभयो।
कार्यक्रममा बालअधिकार, बालश्रम निवारण तथा शिक्षा सम्बन्धी सचेतनामूलक प्रस्तुति, सांस्कृतिक कार्यक्रम, र सर्वपक्षीय सहभागिता देखिएको थियो।
मन्थली नगरपालिकाले बालमैत्री स्थानीय शासन स्थापनाका लागि सहकार्य गर्ने सबै राजनीतिक दल, वडा समिति, शिक्षक, विद्यार्थी, अभिभावक, नागरिक समाज, सञ्चारकर्मी तथा सरोकारवालाहरूलाई आभार प्रकट गर्दै आगामी दिनमा समेत बालमैत्री वडा र नगरलाई दिगो रूपमा अघि बढाउने प्रतिबद्धता व्यक्त गरेको छ।
