काठमाडौं — गृहमन्त्री रमेश लेखकले आमाको नामबाट नागरिकता पाउने अधिकार सुनिश्चित गर्न नेपाल नागरिकता ऐनमा संशोधन गर्ने तयारी भइरहेको बताएका छन्।
सोमबार राष्ट्रिय सभाको विधायन व्यवस्थापन समितिको बैठकमा प्रस्तुत नेपाल नागरिकता (दोस्रो संशोधन) विधेयकमाथि छलफल गर्दै गृहमन्त्री लेखकले बुबाको मृत्यु भएको, जीवित रहँदा पनि नागरिकता दिन असहयोग गरेको वा अर्को विवाह गरेर गएको अवस्थामा सन्तानले आमाको नामबाट नागरिकता पाउन सक्ने व्यवस्था विधेयकमा समावेश गरिएको बताए।
उनले भने, “बुबाले सन्तानलाई अपनत्व वा आवश्यक माया नदिएको अवस्थामा बाबुलाई बाबु मान्नैपर्छ भन्ने बाध्यता छैन।”
गृहमन्त्री लेखकले आमाको नामबाट नागरिकता दिने विषयमा सर्वोच्च अदालतको निर्देशनपछि सरकारले विधेयक अघि बढाएको जानकारी दिए। आमाले स्वघोषणा गरे मात्रै नागरिकता प्राप्त गर्न सक्ने व्यवस्था गरिएको उनले बताए।
विदेशमा सन्तान जन्मिएमा वा गर्भावस्थामा आमा स्वदेश फर्किएर बुबा पत्ता नलाग्ने अवस्थामा पनि आमा र सन्तानको अधिकार सुनिश्चित गर्न आमाको स्वघोषणामा आधारित नागरिकता दिने प्रावधान गरिएको छ। साथै, सन्तानले आमाको नामबाट नागरिकता लिएपछि बुबाको नाम राख्न नचाहेको अवस्थामा पनि नागरिकता दिइने व्यवस्था गरिएको छ।
