काठमाडौँ: ऊर्जा, जलस्रोत तथा सिँचाइ, भौतिक पूर्वाधार र सहरी विकासमन्त्री कुलमान घिसिङले सिंहदरबार परिसरमा निर्माणाधीन सङ्घीय संसद् भवन आगामी पुसभित्रै पूरा गर्नुपर्ने बताएका छन्।
आज उनले सहरी विकास मन्त्रालयका सचिव गोपाल सिग्देल, विशेष भवन निर्माण आयोजना तथा समन्वय कार्यालयका अधिकारी, परामर्शदाता र निर्माण व्यवसायीसँग भवन निर्माणको प्रगति सम्बन्धमा छलफल गर्दै पुसमै निर्माणसम्पन्न हुने गरी काम अगाडि बढाउन निर्देशन दिएका हुन्।
मन्त्री घिसिङले भने, “जेनजी आन्दोलनका क्रममा बानेश्वरस्थित संसद् भवनमा ठूलो क्षति पुर्याइएपछि हाल संसद् भवन नै छैन। यस अवस्थामा अब कुनै बहाना स्वीकार्य छैन। सबै पक्षले गम्भीर भएर समयमै कार्यसम्पन्न गर्नुपर्छ।”
संसद् भवन विसं २०७६ असोजमा ठेक्का सम्झौताअन्तर्गत तीन वर्षभित्र निर्माणसम्पन्न गर्ने लक्ष्यसहित ठेक्का सम्झौता भएको थियो। हालसम्म पाँचपल्ट म्याद थप भए पनि ठेक्का सम्झौताको अन्तिम म्याद आगामी पुसमा सकिँदैछ। भवनको भौतिक प्रगति हाल ८६ प्रतिशत पुगेको छ।
निर्माण कार्य अन्तर्गत राष्ट्रिय र प्रतिनिधिसभा हलमा ‘फल्स सिलिङ’का लागि थप ट्रस, पहिलो तलामा रहेको ‘मल्टिपरपज’ हलमा ‘फल्स सिलिङ’का लागि थप ट्रस, इलेक्ट्रिकल काम अन्तर्गत मुख्य ‘एलटी प्यानल’, सहायक ‘एलटी प्यानल’ र फायर फाइटिङ प्रणाली जस्ता काम बाँकी रहेका छन्।
अनियमितता रोकथाम र कारबाही
मन्त्री घिसिङले आफ्नो कार्यलयअन्तर्गत हुने अनियमितता तुरुन्तै रोक्न निर्देशन दिएका छन्। उनले चेतावनी दिएका छन् कि अनियमितता फेला परेमा संलग्नलाई तुरुन्तै कारबाही गरिनेछ।
उनले भने, “विगतमा बजेटको दुरुपयोग र भ्रष्टाचारको आरोप सुनिन्थ्यो। जेनजी आन्दोलनको मुख्य एजेन्डा नै भ्रष्टाचार नियन्त्रण थियो। अनियमिता रोक्न नसकिने हो भने ठूलो निराशा उत्पन्न हुन्छ। एक रुपैयाँ पनि अनियमित रूपमा प्रयोग भएमा संलग्नलाई छाडिने छैन। साथै, सेवा प्रवाहमा सुधार गर्नुहोस्।”
