मकवानपुर ।
आज मिति २०८२ साल पौष १७ गते तथ्याङ्क दिवसको अवसरमा “आधिकारिक तथ्याङ्क : पारदर्शी शासन” भन्ने मूल नाराका साथ तथ्याङ्क समन्वय कार्यालय, मकवानपुरद्वारा तथ्याङ्क प्रदायक उद्योगीहरूसँग अन्तरक्रिया कार्यक्रम सम्पन्न भएको छ।
कार्यक्रममा तथ्याङ्क उपलब्ध गराउने उद्योगी तथा सरोकारवालाहरूलाई सम्मान तथा मायाको चिनो प्रदान गरिएको थियो। साथै कार्यालय परिसरमा वृक्षारोपण कार्यक्रमसमेत आयोजना गरिएको छ।
त्यसैगरी मुख्यमन्त्रीको कार्यालय तथा बागमती प्रदेश सरकारअन्तर्गतका विभिन्न मन्त्रालयहरूमा राष्ट्रिय तथ्याङ्क कार्यालयद्वारा प्रकाशित राष्ट्रिय जनगणना २०७८ लगायतका महत्वपूर्ण प्रकाशनहरू वितरण गरिएको थियो।
कार्यक्रमको अध्यक्षता तथ्याङ्क समन्वय कार्यालय, मकवानपुरकी निमित्त कार्यालय प्रमुख श्री रागिनी कुमारी वर्मा ज्यूले गर्नुभएको थियो। प्रमुख अतिथिका रूपमा सहायक प्रमुख जिल्ला अधिकारी श्री मोहनराज जोशी ज्यूको उपस्थिति रहेको थियो भने विशिष्ट अतिथिका रूपमा बागमती प्रदेश निर्वाचन अधिकारी श्री हरि ढकाल ज्यू तथा राष्ट्रिय तथ्याङ्क कार्यालयका निवर्तमान सहसचिव श्री गणेश आचार्य ज्यू सहभागी हुनुहुन्थ्यो।
त्यस्तै अतिथिका रूपमा आन्तरिक राजस्व कार्यालय, मकवानपुरका कर अधिकृत श्री राजकुमार वि.क. ज्यूको समेत उपस्थिति रहेको थियो।
कार्यक्रममा उपस्थित अतिथि तथा सहभागीहरूलाई यस कार्यालयकी सूचना अधिकारी एवं तथ्याङ्क अधिकृत श्री रेणु कुमारी धिमिरे ज्यूले स्वागत मन्तव्यसहित कार्यक्रमको उद्देश्य र महत्वबारे स्पष्ट जानकारी दिनुभएको थियो। कार्यक्रम सञ्चालनको भूमिका सुपरिवेक्षक श्री सुभाष कोइराला ज्यूले निर्वाह गर्नुभएको थियो।
कार्यक्रमलाई सभ्य, भव्य तथा सफल बनाउन व्यस्त समयका बाबजुद उपस्थित भई सहयोग गर्नुहुने सम्पूर्ण अतिथि तथा सहभागीहरूप्रति तथ्याङ्क समन्वय कार्यालय, मकवानपुर परिवारले हार्दिक आभार प्रकट गरेको छ।
