सिन्धुली । शिक्षा क्षेत्रमा देखिएको दूरदर्शिता, नवप्रवर्तन र गुणस्तरीय सुधारको पहिचानस्वरूप मरिण गाउँपालिका (सिन्धुली) “PAN उत्कृष्ट गाउँपालिका पुरस्कार २०८२” बाट सम्मानित हुने भएको छ। देशभरका स्थानीय तहको विश्लेषणपछि प्रिन्सिपल्स एसोसिएसन अफ नेपाल (PAN) ले मरिणलाई बागमती प्रदेशकै उत्कृष्ट गाउँपालिका घोषित गरेको हो।
प्रा.डा. विद्यानाथ कोइरालाको अध्यक्षतामा गठित मूल्याङ्कन समितिले निर्धारण गरेका २५ वटा शैक्षिक सूचकांकहरूका आधारमा गरिएको मूल्याङ्कनमा मरिणले उल्लेखनीय अग्रता लिएको बताइएको छ। विद्यालय प्रशासनमा पारदर्शिता, शिक्षाको गुणस्तर अभिवृद्धि, सिर्जनात्मक कार्यशैली र नेतृत्व क्षमताको सुदृढीकरण — यी सबै पक्षमा मरिणको पहलकदमी उच्च मूल्याङ्कनमा परेको हो।
सम्मान स्वरूप प्रदान गरिने पुरस्कार यही जेठ २३ गते पोखरामा आयोजना हुने “PAN दोस्रो राष्ट्रिय सम्मेलन २०८२” मा प्रदान गरिनेछ। “नेतृत्वका नयाँ परिभाषा : विद्यालय उत्कृष्टताका लागि परिवर्तनको अगुवाइ” भन्ने मूल नाराका साथ हुने उक्त सम्मेलनमा देशभरका शैक्षिक अगुवा, नीति निर्माता र सरोकारवाला सहभागी हुनेछन्।
गाउँपालिकाका अध्यक्ष तथा स्थानीय जनप्रतिनिधिहरूले यो उपलब्धिलाई सम्पूर्ण मरिणवासीको साझा प्रयास र सफलताको प्रतिबिम्बका रूपमा लिएको जनाएका छन्। “यो केवल एउटा सम्मान होइन, आगामी दिनमा अझ प्रभावकारी शिक्षण सिकाइ र समावेशी शैक्षिक विकासको दिशामा अघि बढ्न प्रेरणा हो,” गाउँपालिका अध्यक्षको भनाइ छ।
शिक्षामा देखिएको नवीन सोच, योजनाबद्ध कार्यान्वयन र सामुदायिक सहभागिताको यो सफल उदाहरणले देशका अन्य स्थानीय तहलाई पनि प्रेरणा दिने विश्वास गरिएको छ।
पालिकामा शिक्षा गुणस्तर दिन हाम्रो एक्यवद्धता छ पलिका प्रमुख प्रख्यात मोक्तान भन्छन्: हामि नागरिकका छोराछोरीलाई सामुदायिक बिधालय बाटनै गुणस्तर शिक्षा दिन लागेका छौँ ।
