काठमाडौं :प्रधानमन्त्री केपी शर्मा ओलीले राजनीतिमा कहिले कसलाई जेल जानु पर्छ भन्न नसकिने बताएका छन्। आइतबार बालुवाटारमा आयोजित बिपी कोइराला राष्ट्रिय पुरस्कार–२०८१ सम्बन्धी कार्यक्रममा बोल्दै उनले पूर्वाग्रह र प्रतिशोधका कारण नेताहरूलाई जेल हालिएको इतिहास रहेको उल्लेख गरे।
प्रधानमन्त्री ओलीले दरबार हत्याकाण्डपछि तत्कालीन राजा ज्ञानेन्द्र शाहले शासन कब्जा गरे पनि प्रत्यक्ष रूपमा दलहरूमाथि प्रतिबन्ध नलगाए पनि नेताहरूलाई जेल हालिएको प्रसंग स्मरण गरे।
“राजनीतिमा कहिले को जेल पर्छ, भन्न सकिँदैन,” प्रधानमन्त्री ओलीले भने, “पूर्वाग्रह, प्रतिशोधका कारण नेताहरूलाई मुद्दा लगाएर फसाउने काम गरिन्छ। दरबार हत्याकाण्डपछि ज्ञानेन्द्रले शासन लिँदा दलहरूलाई घरमै नजरबन्द वा जेलमा थुने। राज्यका निकायहरू पन्छाएर आफ्ना मान्छे लगाएर मुद्दा लगाइन्छ।”
उनले तत्कालीन राजा ज्ञानेन्द्रद्वारा शेरबहादुर देउवाविरुद्ध भ्रष्टाचारको आरोपमा शाही छानबिन आयोग गठन गरेर मुद्दा चलाइएको घटनालाई “राजनीतिक ड्रामा”को संज्ञा दिए।
“ज्ञानेन्द्र शाहले भ्रष्टाचारविरोधी देखिन खोज्दै शाही आयोग बनाएर देउवामाथि मुद्दा चलाए। त्यो भन्दा ठूलो ड्रामा अरू के हुन सक्छ?” ओलीले भने, “यस्ता ड्रामासँग अझै पनि लड्नुपर्ने अवस्था आउँछ।”
कार्यक्रममा प्रधानमन्त्री ओलीले बिपी कोइरालाका विभिन्न बहुआयामिक पक्षहरूको चर्चा गर्दै उनको योगदानलाई स्मरण गरेका थिए।
