काठमाडौं: परराष्ट्रमन्त्री डा. आरजु राणा देउवाले भारतको उत्तराखण्डमा केही दिनअघि आएको विनाशकारी बाढीमा परेका हराएका नेपाली नागरिकहरूको खोजी र उद्धारका लागि कूटनीतिक पहल सुरु भइसकेको जानकारी दिनुभएको छ।
सो बाढीमा केही नेपाली बेपत्ता भएको खबर आएसँगै नेपाल सरकारले उनीहरूको खोजी र उद्धारमा तत्परता देखाउँदै नयाँ दिल्लीस्थित नेपाली राजदूतावासलाई भारत सरकारसँग समन्वय गरी तदारुकता अपनाउन निर्देशन दिएको छ।
मन्त्री राणाले सामाजिक सञ्जालमार्फत आफूलाई नेपालीहरूको बेपत्ता भएको खबरले गम्भीर रूपमा दुःखी बनाएको र बाढी पहिरोमा ज्यान गुमाउनेहरू प्रति श्रद्धाञ्जली अर्पण गर्दै पीडित परिवारप्रति समवेदना व्यक्त गर्नुभएको छ।
साउन २० गते भारतको उत्तराखण्डको उत्तरकाशी जिल्लामा पर्ने धराली गाउँमा आएको बाढी र पहिरोले ठूलो जनधन क्षति पुर्याएको छ। अहिले त्यहाँ खोज तथा उद्धार कार्य जारी रहेको छ।
हालसम्म कम्तीमा २२ नेपाली सम्पर्कविहीन रहेका छन्। जाजरकोटका १३, धादिङका ४, बर्दियाका ४ र जुम्लाका १ जना नेपाली बेपत्ता भएको सम्बन्धित स्थानीय जनप्रतिनिधिहरूले जनाएका छन्।
