काठमाडौँ: विश्व बैङ्कले नेपालको शैक्षिक विकासमा आवश्यक सहयोग गर्ने प्रतिबद्धता जनाएको छ।
शिक्षा, विज्ञान तथा प्रविधिमन्त्री सस्मित पोखरेलसँग आज शिक्षा मन्त्रालयमा भएको भेटमा नेपालस्थित विश्व बैङ्कका देशीय निर्देशक डेभिड सिस्लेनले उक्त प्रतिबद्धता व्यक्त गरेका हुन्।
भेटका क्रममा शिक्षा क्षेत्र सुधार, शैक्षिक पूर्वाधार विस्तार तथा प्रविधिमैत्री शिक्षण प्रणाली विकासका विषयमा छलफल भएको थियो। विश्व बैङ्कले विद्यालय तथा शैक्षिक पूर्वाधार विकासमा थप लगानी र सहकार्य गर्न इच्छुक रहेको जनाएको छ। साथै, दीर्घकालीन सुधार र गुणस्तरीय शिक्षामा पहुँच विस्तारका लागि साझेदारीलाई अझ प्रभावकारी बनाउने विषयमा पनि छलफल भएको मन्त्रालयले जनाएको छ।
मन्त्री पोखरेलले सरकारका प्राथमिकताबारे जानकारी दिँदै शैक्षिक पूर्वाधार विकास, ‘फाउन्डेसन लर्निङ’ सुदृढीकरण तथा शिक्षामा ‘डिजिटाइजेसन’ र प्रविधिको विस्तारलाई प्रमुख एजेन्डाका रूपमा अघि बढाइएको बताए।
