पुष्कर खड्का
रामेछाप । रामेछापको लिखु तामाकोसी गाउँपालिकाको एक युवकलाई प्रहरीले पक्राउ गरेको छ। पक्राउ पर्नेमा लिखु तामाकोसी गाउँपालिका वडा नं –२ का २६ वर्षीय पोसाक सुनुवारलाई प्रहरीले पक्राउ गरेको छ।
सुनुवारले वैदेशिक रोजगारीका निम्ति माल्टा पठाइदिने भन्दै रकम ठगी गरेको आरोपमा काठमाडौं उपत्यका अपराध अनुसन्धान कार्यालयको टोलीले शनिबार बेलुका उनलाई काठमाडौंकै म्हैपीबाट पक्राउ गरेको हो ।
उनले टेकबहादुर गुरुङलाई वैदेशिक रोजगारीका निम्ति माल्टा पठाइदिने बताएका थिए । त्यसका निम्ति प्रतिव्यक्ति नौ लाख ५० हजार रुपैयाँ लाग्ने भनेका थिए । माल्टा पुगेपछि प्रतिष्ठित कम्पनीमा काम लगाइदिने र मासिक एक लाख रुपैयाँ तलब हुने भन्दै प्रलोभनमा पारी ठगी गरेको खुलेको सो कार्यालयका सूचना अधिकारी एवं एसपी मिलन केसीले जानकारी दिनु भयो ।
प्रहरीका अनुसार ‘पीडित’बाट पटक–पटक गरी तीन लाख ३० हजार रुपैयाँ लिई उनी सम्पर्क विहीन भएका थिए । सुनुवारलाई थप अनुसन्धान र कारबाहीका निम्ति वैदेशिक रोजगार विभागमा पठाइएको प्रहरीले जनाएको छ ।
