क्यानडासँगको शृङ्खलामा नेपालको क्लिन स्वीप

क्यानडाविरुद्ध तेस्रो तथा अन्तिम एकदिवसीय क्रिकेटमा नेपाल ९ विकेटले विजयी भएको छ । यससँगै नेपालले तीन खेलको सिरिज क्लिनस्वीप गरेको छ । क्यानडाले दिएको २३३ रनको लक्ष्य नेपालले मात्र १ विकेटको क्षतिमा पूरा गरेको हो । त्रिवि क्रिकेट मैदान कीर्तिपुरमा भएको खेलमा ४४ दशमलब ३ ओभरमा लक्ष्य पूरा गरेको हो । जितमा अनिल शाहको ११२ रन र भीम सार्कीको १११ रनको अविजित योगदान रहेको हो । दुवै खेलाडीको यो पहिलो शतक हो । पहिले ब्याटिङ गरेको क्यानडाले निर्धारित ५० ओभरमा ८ विकेट गुमाएर २३२ रन बनाएको थियो । यसअघि भएको पहिलो एकदिवसीय खेल नेपालले ७ रनले र दोस्रो खेल ४ विकेटले जितेको थियो ।