हेटौंडा । मंगलबार मनहरी गाउँपालिकामा संचालन भएको पालिकास्तरीय आधारभूत तह(कक्षा-८) को वार्षिक परीक्षामा प्रश्न पत्रमा गम्भीर त्रुटि भएकोप्रति ध्यानाकर्षण भएको जनाएको छ । नेपाली विषयको प्रश्नपत्रमा प्राविधिक त्रुटि भएको भन्दै सामाजिक सञ्जालमा उठेको विषयमा प्रेस विज्ञप्ति जारी गर्दै मनहरी गाउँपालिका आधारभूत तह (कक्षा-८) परीक्षा सञ्चालन तथा व्यवस्थापन समितिको गम्भिर ध्यानाकर्षण भएको जनाएको हो ।
परीक्षालाई मर्यादित बनाउन र अझ परीक्षाको गरिमा कायम गर्नका लागि मनहरी गाउँपालिका परीक्षा समितिले प्रधानाध्यापक तथा सरोकारवालाहरुसँग समेत पर्याप्त छलफल गरिएको बताएको छ । यस बर्ष पनि फरक फरक विद्यालयमा फरक फरक विद्यालयबाट केन्द्राध्यक्ष तोकी उनीहरुको काम, कर्तव्य र अधिकारबारे अभिमुखीकरण गराएर पठाइएको विज्ञप्तिमा उल्लेख छ । परीक्षा समितिले विषय विज्ञहरुमार्फत प्रश्नहरु संकलन गरी बिषयगत प्रश्नहरु निर्माण गरी पालिकाभरका आधारभूत तहका विद्यालयहरुमा एकद्वार प्रणालीमा प्रश्नपत्र पठाउनका लागि पर्याप्त सहयोग गरेको छ । तर, परीक्षाको तेस्रो दिन चैत ६ गते नेपाली विषयको प्रश्नपत्रमा प्राविधिक कमीकमजोरी भएकोले परीक्षा समितिको तर्फबाट उक्त प्रश्नपत्र खारेज गरिएको जनाएको छ । जसले गर्दा तत्कालै नयाँ प्रश्नपत्रबाट परीक्षा सञ्चालन गरिएको विज्ञप्तिमा उल्लेख गरिएको छ ।
प्रश्नपत्रमा कमिकमजोरी देखिनासाथ खारेज गरिएको बताएको छ । सामाजिक सञ्जालमा आएको प्रश्नपत्रवाट परीक्षा सञ्चालन नभएको/नगरिएको विज्ञप्ति मार्फत दावी गरिएको छ । साथै, उक्त प्राविधिक कमजोरीबाट के कति कारणले हुन गएको हो भन्नेबारेमा परीक्षा समितिले छानबीन गरी कारबाही प्रक्रिया समेत अघि बढाइने व्यहोरा जानकारी गराइन्छ विज्ञप्तिमा उल्लेख छ । विद्यार्थीको शैक्षिक गुणस्तर र मूल्याङ्कनमा गाउँपालिका संवेदनशिल रहेको व्यहोरा सबैमा जानकारीका लागि अनुरोध गरिएको परीक्षा सञ्चालन तथा व्यवस्थापन समितिका संयोजकले बताए । यसअघि आइतबार मकवानपुरगढी गाउँपालिका र हेटौंडा उपमहानगरपालिकाले संचालन गरिएको अनिवार्य गणित विषयमा पनि प्राविधिक त्रुटि रहेको थियोे ।
