रामेछाप
मन्थली नगरपालिका अन्तर्गतका संस्थागत विद्यालयरूले आइतबार पनि पठनपाठन सुचारु गरेका छन्। अभिभावक र विद्यार्थीको मागलाई सम्बोधन गर्दै विद्यालय सञ्चालन गरिएको रामेछाप प्याब्सनका सचिव रमेशराज फुयालले बताएका छन्।
संघीय सरकारले शनिबार र आइतबार सार्वजनिक बिदा दिने निर्णय गरेपछि देशका विभिन्न स्थानीय तहमा फरक फरक अभ्यास देखिएको छ। केही स्थानीय तहले सरकारी कार्यालय र विद्यालय नियमित सञ्चालन गरिरहेका छन् भने कतिपय स्थानमा पूर्ण रूपमा बिदा दिइएको छ।
मन्थली नगरपालिकाले यस विषयमा छुट्टै निर्णय नगरेकाले प्याब्सनले आफ्नै निर्णयअनुसार संस्थागत विद्यालय सञ्चालन गरेको सचिव फुयालले जानकारी दिए। उनका अनुसार विद्यार्थीको पढाइ प्रभावित नहोस् भन्ने उद्देश्यले आइतबार पनि कक्षा सञ्चालन गरिएको हो।
यता, नगरपालिकाभित्रका सामुदायिक विद्यालय भने आइतबार बन्द रहेका छन्। एउटै पालिकाभित्र संस्थागत विद्यालय खुला र सामुदायिक विद्यालय बन्द हुँदा अभिभावक तथा सरोकारवालामाझ अन्योलता देखिएको छ।
यस विषयमा प्रतिक्रिया लिन मन्थली नगरपालिकाकी शिक्षा शाखा प्रमुख हित कुमारी पौडेल सँग सम्पर्क गर्न खोजिएको भए पनि फोन सम्पर्क हुन सकेन। शिक्षा शाखाका एक कर्मचारीले भने यस विषयमा नगरपालिकाबाट कुनै औपचारिक निर्णय नभएको बताएका छन्।
पत्रकार कुमार श्रेष्ठले विद्यालय आइतबार बन्द गरेर शिक्षा सुधार सम्भव नहुने धारणा व्यक्त गरेका छन्। बालबालिकाको सिकाइ हुने महत्वपूर्ण समय यही उमेर हो, त्यसैले आइतबार विद्यालय बन्द गर्नु उपयुक्त हुँदैन, उनले बताए।
तस्वीर :एआई
